Hmarchhak security atana sum sen tlahniam

Hmarchhak biala dan leh thupek dinhmun ziaawm chho zel avangin security kaihhnawiha sum sen pawh a tlahniam zel.

Record-in a tarlan danin, kum 2017-2018 khan security kaihhnawiha hmarchhak state-te sum hman chu cheng vaibelchhe 405 a tling a, Assam chu a hmang hnem ber niin cheng vaibelchhe 287 a seng a ni. Manipur-in cheng vaibelchhe 34 a hmang bawk. Arunachal Pradesh chu state ralmuang tak ni mah se, state danga helpawlte chu AP-a Tirap, Changlang leh Longding district-ahte an che fo a, hei vang hian sorkar laipui chuan heng district pathumte hi Disturbed Area-ah a puang a ni. District pathuma helho chetna avang hian Arunachal Pradesh sorkar chuan kum 2017-2018 chhung khan security kaihhnawih thila hman tur cheng vaibelchhe 32 a dawng a ni. 

Nikum chhunga security lama hmarchhak bial sum hman chu cheng vaibelchhe 250-ah a tlahniam a, Assam chu a dawng hnem ber ni lehin cheng vaibelchhe 137 a dawng a, Nagaland-in cheng vaibelchhe 42 leh Manipur-in cheng vaibelchhe 32 an dawng bawk. 

Financial year kal mekah sorkar laipuiin hmarchhak bial security kalpuina tura a sum ruahman chu cheng vaibelchhe 195 a ni. He scheme hnuaiah hian security atana sum sente hi sorkar laipui leh state sorkarin 90:10-in an intum sem a ni.