Assam CM hoin Khelo India Youth Games thlen tur thlirlawk

Assam chief minister Sarbananda Sonowal chuan nakkum January thlaa Guwahati-a Khelo India Youth Games-2020 an thlen tur chu hlawhtling taka neih a nih theihna tura hma la turin  organising committee a chah. 

Khelo India Youth Games 2020 neih tur atana an inbuatsaih dante thlirho a, high-level meeting neihah CM chuan state sorkar leh games organising body-te chuan Games an thlen tur chu buaina laka a fihlim theihna tura thil engkim an chinfel a ngai a ni, a ti. He games neih tur hi a hlawhtlin theihna turin science leh technology lam pawh hmang ṭangkai leh chhawr thiam turin a chah bawk. 

Assam CM chuan Khelo India Youth Games chu ṭhalai, kum 17-21 inkarte tana sports event pui tham tak a nih avangin, hemi chungchang inhrilhhriatna pawh nasa taka kalpui a ngai a, an state chhung khawi hmun ami pawh, talent nei ṭha tak takten he games hi an hriat a pawimawh a ni, a ti. Games ṭan hma hian state chhungah torch rally huaihawt se a duh thu a sawi bawk. 

Infiammi kalkhawmte chu khawpui chhung hotel hrang hrangah an thlen dawn avangin, an thlenna hotel-te thlithlai a, chanchin ngaihvenna tur main control room siam a ṭul thu Sonowal chuan a sawi. Games an thlen chhung hian single-use plastic hmang lo tura tiin, plastic-free games-a siam turin a buaipuitute a chah a ni.