Manipur Congress hruaituin Lungrual taka CAB do turin sawm

Manipur Cong­ress hruaitu, MLA Kh Joykishan chuan Citizenship (Amend­ment) Bill dodal kawngah party hrang hrangte chu inlungrual turin a sawm a, sorkar laipui chuan Parliament session lo awm turah CAB hi pass ngei tumin a bei dawn a ni, a ti. 

Congress MLA chuan political party leh civil society organisation hrang hrangte chuan an inrem lohnate dahṭha a, bill dodal tura lungrual taka aw an chhuah loh chuan khua a tlai mai dawn a ni tiin Imphal-a press conference a neihnaah a sawi. 

Joykishan chuan CAB pass a nih hnuah dodalna lo lantir leh chuan awmzia a nei tawh dawn lo a, hei vang hian pass a nih lohna turin tun aṭanga theihtawp chhuah beih a hun tih a sawi bawk. Manipur-a BJP sorkar chu CAB chungchang la thutak tawk loah a puh a, "Parliament-a CAB pass tur hi dan a nih loh chuan, state leilung fate hi hmalam hun hi a dinhmun derthawng takah dah a ni dawn a ni," a ti. 

State voters list-a 'non-local' telh an nih chungchang pawh sawichhuakin, Congress MLA chuan he thil hi chhui chiang turin sorkar chu a phut a, thil dik lo titute chu hremna pe ngei tura a phut thu a sawi. Assembly constituency 60-a MLA tinte chu an bial chhunga voters list-a 'non-local' awmte zawnchhuah kawnga mawhphur ngam turin a ngen bawk.