Vawiinah Kaziranga Park hawng dawn

Assam-a UNESCO world heritage site, Kaziranga National Park chu vawiin hian khualzinte tlawh theih turin hawn a ni dawn tih Divisional Forest Officer Rohini Ballav Saikia chuan a sawi. 

Saikia chuan vawi­ina hawn tur hi Kohoar leh Bagori range chauh a ni rih tih sawiin, range dangte chu nidangah hawn a ni thung ang. Elephant safari a rem hrih loh vangin park chhungah hian jeep safari chauh tlantir phal a ni dawn tih a sawi bawk. 

Park chhunga kawng siamṭhat hna chu thawh mek a ni tih Saikia chuan a sawi a, range dangah pawh safari chu phal a ni thuai ang, a ti. Kaziranga National Park hi khawvela samak ki khat nei chi awm khawm tamna ber a ni. Mahse fur ruahsurin park hi a chim nasat ṭhin avangin kumtinin May thla hnu lamah hian hun eng emaw chen khar a ni ṭhin. Kumin furah pawh park 70% vel zet chu tuiin a chim a, ramsa 200 chuang zet an thih phah bawk a ni. 

Kum 2018 census-a a landanin, parkah hian samak ki khat nei chi hi 2,400 chuang an awm. Hei bakah hian Royal Bengal Tiger 104 an awm bawk.