Manipur sorkar hnenah Oct 12 thleng hun pe

Manipur-a Joint Action Committee (JAC) chuan hmeichhe naupang kum 12 mi, N Babysana thih dan chhui hna chu Central Bureau of Inves­tigation (CBI) kuta hlan thuai turin state sorkar an nawr a, October 12 thleng hun an pe. 

July 18 zing khan Imphal-a Standard Roberth Higher Secondary-a class VII zirlai, N Babysana hi hostel domitory-ah thia hmuh a ni. A thih danah thil rinhlelhawm a awm nia sawiin, JAC chuan chhui chian an phut a ni. CBI kuta hlan tura JAC ngenna hi civil society organisation leh zirlai pawl hrang hrangte pawhin an thlawp a ni. 

State chief minister N Biren Singh chuan JAC-te ngenna hi tihhlawhtlin tiam mah se, tun thlengin CBI kutah hlan a la ni lo. Ningani khan JAC hian meeting nei lehin, state sorkar chu an nawr leh a, October 12 thleng hun an pe a ni. JAC convenor L Gyaneshori chuan hun pek chhunga CBI kutah hlan a nih loh chuan, October 14 hian darkar 14 awh nawrh an huaihawt leh dawn tih a sawi.