Amit Shah-a'n ramri buaina chingfel turin NE state-te a chah
North Eastern Council (NEC) 69th Plenary meeting kaihruaitu, union home minister Amit Shah chuan hmarchhak state-te chu state ramri buaina chu anmahnia inchingfel turin a chah.
Amit Shah chuan ramri chungchanga buaina ngei state chief minister-te chu an buaina chinfel dan ngaihtuah tura State to State level talk buatsaih ṭhin tur leh, sorkar laipui inrawlh kher ngai loa chingfel turin a ti a ni.
Bangladesh leh India pawhin international border chungchanga buaina an chinfel theih laiin, hmarchhak state, India ram chhung vekte chuan engvangin nge ramria an buaina hi an chinfel mai theih loh, tiin union minister chuan a zawt.
Assam hian a ṭhenawm state, Nagaland, Arunachal Pradesh, Mizoram leh Meghalaya-te nen ramri chungchangah buaina a nei mek a, chief ministerial leh chief secretary level inbiaknate pawh ṭum eng emaw zat an lo nei tawh hlawm a, mahse tun thlengin buaina hi chinfel a la ni hlawm lo a ni.
Kar liam ta Inrinnia Shillong-a NEC 60th Plenary meeting neihah hian hmarchhak state pariata Governor leh Chief Minister-te an tel. Amit Shah chuan hmarchhak biala hmasawnna a awm tel chauhin India ram pumah hmasawnna a awm tih a sawi theih tih sawiin, hmarhchak hmasawnna chuan bial chhunga sakhaw tin leh mitin, ṭawng hrang hrang hmangte a thleng phak tur a ni, a ti. Kum 2014-a Prime Minister dinhmun a luah khan, Narendra Modi chuan hmarchhak bialin hma a sawn chuan, sorkar laipui pawhin development scheme hrang hrangah a dah pawimawh dawn tih a lo sawi tawh a ni, a ti.