IPFT-in Tipraland state din phutna tharthawh leh

Indigenous People’s Front of Tripura (IPFT) chuan Autonomous District Council inthlan nei tura inbuatsaih chhoh mek karah, Tipraland state hran din an phutna an tharthawh leh. 

IPFT thupuangtu, Shukla Charan Noatia chuan January 17 aṭang khan state hran phutin kawngzawh huaihawt leh a ni tih a sawi. Kawng zawh hi Golaghati area ṭangin ṭan a ni a, ni nga chhung nei tawhin Sepahijala district-a Dhanpur an zawh thleng tawh. Hmun hrang hrang aṭangin kawng zawh hi an rawn zawm tih a sawi bawk. 

Tripura-a BJP kaih­hruai ṭangrual sorkarah IPFT hi tel ve mah se, kum 2009 aṭang khan state hran din hi an lo ngiat tawh a ni. Tripura High Court thupek angin ADC inthlan hi May 17, 2021 hian buatsaih a ni dawn a,  inthlanah hian IPFT  leh BJP hi an inkhing dawn a ni.