AASU-ten sit-in protest huaihawt

All Assam Students' Union (AASU) chuan kar liam ta Inrinnia prime minister Narendra Modi-a'n an state a tlawh laiin Jorhat-ah Citizenship Amendment Act (CAA) duh lohna an lantir a, badge dum belin sit-in protest an huaihawt. 

AASU hian CAA duhlohna lantirin ni 3 chhung nawrh an huaihawt a, nikum December thlaa Parliament-a pass CAA chu sut leh vek turin sorkar laipui an phut a ni. CAA sut bakah zirlai pawl hian draft Environmental Impact Assessment (EIA) 2020 notification sut leh, dan loa Bangladesh aṭanga pem lutte hnawt chhuah an phut bawk. Hei bakah hian Assam Accord Clause VI chu a rang thei anga kalpui turin an phut bawk a ni.

Zirlai pawl chuan prime minister Narendra Modi-a'n Sivasgar district a tlawh ni taka  nawrh an huaihawtna chhan chu sorkar laipuiin Assam a ngaihthah zia leh, PM Modi-a ngeiin a thu lo tiam tawhte a tihhlawhtling loh zia lantirna a ni tih an sawi. Zirtawpni zana CAA duh lohna lantira zirlaiten torch rally huaihawt an tum, sorkar laipuiin a lo dang lui chu an dem thu an sawi bawk. AASU hian state pumah kar liam ta Zirtawpni kahn CAA duh lohna lantirin torch rally hi an huaihawt a ni.