PMAY kalpuinaah NE-ah Tripura pakhatna

Tripura chief minister Biplab Kumar Deb chuan Prime Minister Awas Yojana (PMAY) kalpuinaah Tripura chu hmarchhak state zingah pakhatna niin, rampumah pahnihna a ni tih a sawi. 

Agartala Town Hall-a 'Angikar campaign' hawnna inkhawma thu a sawiah, CM Deb chuan a kaihhruai BJP sorkar chuan in nei lote chenna turin flat 2,200 siam a tum tih sawiin, Agartala-ah international shopping mall siam an tum bawk tih a sawi. Prime minister Narendra Modi chuan kum 2022-ah ramchhunga in nei lo, chhungkaw tinte chu concrete in siamsak hman vek a tum a ni, a ti. 

Chief Minister chuan hospital thar pahnih siam an tum bawk tih sawiin, hengte hi child care hospital leh eye specialty hospital a ni tih a sawi. Biplab chuan Panchayats leh civic body hrang hrangte chu sorkar hmalakna tihlawh­tling tura theihtawp chhuah turin a chah. Central scheme te chu hmasawnna leh insiamṭhatna tur kawngah thil pawimawh tak an ni tih sawiin, sorkar laipui hmalakna a hlawhtlin theih nan state sorkar chuan a theih angin hma a la zel a ni, a ti.