Bhutan Consul General-in AP Chief Minister hmu

Bhutan Consul General Phub Tshering chuan kar kal ta Zirtawpni khan Arunachal Pradesh chief minister Pema Khandu hmuin, tourism tihchangtlunna tura Bhutan leh Tawang inkar inkalpawhna tur kawngpui siam dan turte an sawidun. 

Consul General hi Consul Sherub Phuntsho-an ṭawiawmin, ni hnih chamin AP hi an tlawh a ni. PM Khandu chuan Tawang district lamah kawngpui siam hna chu zawhfel a ni ṭep tawh tih a sawi a, hetihlai hian Bhutan lamah erawh bul ṭan a la ni lo thung. Tawang leh Bhalukpong inkar rel kawng siam hna pawh kum 2020-ah zawhfel hman beisei a ni a, Tawang-a airport siam rawtna pawh sorkar laipuiah thlen a ni tawh bawk. 

Khandu chuan heng project hrang hrangte hi zawhfel a nih hunah chuan West Kameng leh Tawang district-ah chuan khualzin tam tak an pun phah ngei dawn tih a sawi. Tawang leh Bhutan inkar kawngpui pawh hawn a nih hun chuan ram pahnihte chuan an hlawk­pui dawn tih a sawi. 

AP CM chuan Bhutan sorkar nena inzawmna ṭha tak siam turin an inpeih reng tih sawiin, kawngpui siam a nih hma chuan inkalpawhna tura ropeway siam pawh a rawt nghal bawk. Bhutan chu prime minister Narendra Modi chuan a duhsak hle tih sawiin, lawmpuina a hlan nghal bawk. Bhutan-in kawng hrang hranga hma a sawn chu lawmawm a tih thu a sawi bawk a ni.