Naga buaina chinfelna atana Hun pek Naga Hoho-in pawm lo

Naga Hoho chuan kum tam tak chhung chinfel loha awm tawh, Naga politics buaina chinfelna atana thla thum chhung hun pek chu mipuite tan chuan thil theih a ni lo tih sawiin, buaina zawng zawng chu ṭha taka rem a ṭul tih an sawi.

Naga Hoho president H.K. Zhimomi leh general sec­retary K. Elu Ndang-te chuan Pathianni khan hemi chung­changah hian thuchhuah siamin, sorkar laipui thiltih dan chu in duh lo a nih chuan kalsan rawh u, emaw inhrem chunga lawmman inpek emaw anga an ngaih thu sawiin, inremna zahawm tak siamna tura boruak awm mek chu a tichhe vek thei dawn tih a sawi a ni.

Nagaland governor leh Naga buaina chinfelna atana sorkar laipui aiawhtu ni bawk RN Ravi chuan August thla khan Kohima-a vantlang hmaa thu a sawinaah prime minister Narendra Modi-a'n thla thum chhunga Naga buaina chinfel a duh thu a sawi.

Hoho chuan Naga-te dikna chanvo humhalhna, flag hran leh constitution hran tel lo inremna chu inremna zahawm lo leh pawm theih lo a nih thu an sawi a, Naga mi, kum tam tak chhung an thisen lo chhuah phah tawhte tan chuan thil pawm theih a ni dawn lo tih an sawi a ni.

Sorkar laipui chuan pawl bik eng emaw duhdan ang ringawta inremna an siam a nih chuan thisen tam zawk a chhuak thei dawn tih an sawi. Inbiaknaa tel Naga pawl hrang hrangte chu duhdan inang zawnga, inremna zahawm tak siamna kawng zawng turin an sawm bawk.

Hoho chuan Naga politics buaina chu ngun taka an thlir hnuin kum 22 chhung zet Naga mipuiten an lo nghah tawh chu zahawm taka chinfel a ni tur a ni, an ti.