AP-in leilung fate dikna chanvo humhalhtu tur panel din dawn

Arunachal Pradesh chief minister Pema Khandu chuan sorkar laipuiin Citizenship (Amendment) bill kalpui a tum leh avangin, state sorkar chuan leilung fate dikna chanvo humhalhna kawnga thawktu tur, consultative committee a din dawn tih a sawi. 

CM Khandu chuan committee hian state chhunga pawl hrang hrang, civil society leh zirlai pawl aiawhte chu CAB chungchangah hian a berawn zel dawn a ni, a ti. Bengal Eastern Frontier Regulation Act of 1873 leh Chin Hill Regulations Act, 1896 hnuaiah Arunachal Pradesh-a tribal mite venhimna pek chu tihdal a nih lohna turin, committee hian civil society organisation hrang hrangte rawtna neihnate pawh a lakhawm zel dawn tih sawiin, CAB kalpui a nih kawngah leh, Arunachal mite venhimna pekna tur belh dan turah pawh mawh an phur ang, a ti. 

Khandu chuan tunhnaia Guwahati-a North-East Democratic Alliance (NEDA) meeting neihah khan, union home minister Amit Shah chuan hmarchhaka tribal mite humhalhna pek dante chu CAB hmang chuan a ṭhiahsak dawn lo tih a lo sawi tawh niin a sawi. Chief Minister chuan state leilung fate ngaihdan leh duhdante uluk tak an ngaihtuah hnuah chauh CAB chu Parliament-a pharh tura sorkar laipui an ngen tawh thu a sawi bawk. 

AP-a investment tihpun dan tur chungchang pawh Khandu chuan sawiin, Arunachal entrepeneur-te hmakhua ngaihtuahin, investment summit pawh buatsaih thuai an tum tih a sawi. He summit hmang hian Arunachal sumdawng mite chu investment lam uar tura fuih leh cho an tum tih a sawi. Hei bakah hian tualchhung mi leh pawn lam mi sumdawngte thawhho theihna turte siam an duh tih a sawi.