Assam district ṭhenkhat aṭangin sipai lachhuak dawn

Ministry of home affairs (MHA) leh ministry of defence chuan Assam-a district eng emaw zat-a sipai dahte lakchhuah an remti. Hemi rual hian Assam-a Disturbed Area Act leh AFSPA (Armed Forces Special Powers Act) hman chu chhunzawm zel a la ni thung ang. 

Assam district 33 zinga district 20-a sipai dahte chu a tahtawlin lakchhuah an ni dawn a, heng sipaite hi state dangah a ṭul dan angin dah an ni ang. Assam-ah pawh hian boruak awmdan a zirin dah let leh theih an ni dawn bawk. 

Central ministry pahnihin thu­tlukna an siam hnuah, Assam sorkar chuan MHA hnenah Assam-a Army dah chhunzawm zel tura ngenna a thawn nghal a ni. Mahse hei hi Ministry of home affairs lam chuan a la chhang lo. 

Assam-a hian inlakhran duhtu pawlte avangin kum eng emaw zat chu Army hi dah a ni tawh a ni. Inlakhran duhtute laka beihpui thlak hna hi Army, Assam Police leh CAPF (Central Armed Police Force)-te chuan 'Unified Command Structure' hnuaiah an thawk ṭhin.