South Korea-ah Khasi film-in award dawng

South Korea-a 24th Busan International Film Festival (BIFF) hmannaah, Khasi film 'Iewduh' chuan Kim Jie-seok Award a dawng. Festival-ah hian he film hi pholan a ni bawk. 

Iewduh film director hi Pradip Kurbah niin, producer chu Shankar Lall Goenka a ni. BIFF-a Meghalaya aṭanga film siam a lanna hmasa ber a ni. Producer Goenka chuan international event-a an film siamin hriat a lo hlawh leh, award hial an dawng chu a tan hriatreng tur a nih thu a sawi a, film ṭha dang siam pawhin a tihphur phah thu a sawi. 

National Award ṭum hnih lo dawng tawh, Goenka chuan Khasi ṭawnga film a siam chungchang hi sawiin, "Shillong khua, he hmuna piang leh seilian ka ni. Film hmang hian he society leh Meghalaya mipuite tana thil pek let ve ka duh a, hei vang hian Iewduh hi ka siam ta a ni," a ti. 

Director Pradip Kurbal pawhin Kim Ji-seok Award chu Meghalaya mipuite tana an hlan thu a sawi bawk. Iewduh hi Barabazar tia sawi a ni bawk a, Shillong-a bazar hmun lian leh upa ber zinga a mi. Iewduh film-ah hian he bazar-a eizawngte nitin hun hman dan pholan a ni. He film hi tun thla tawp lama 21st Jio MAMI Mumbai Film Festival neihah pholan a ni leh dawn a, hei bakah hian International Film Festival of India (IFFI), Goa-a pholan tur zingah thlan tel a ni bawk. November thla hian release a ni ang.