Naga politics buaina Interlocutor-in Kohhran leh civil society hruaitute hmu dawn

Nagaland Governor leh Naga politics buaina chinfelna kawnga sorkar laipui aiawha palai ni bawk RN Ravi chuan Zirtawpni, October 18 hian civil society leh Kohhran hruaitute chu state khawpui Kohima-ah meeting a neihpui dawn.

He hunah hian United Naga Council (UNC)-a Naga tribe 14 aiawhte an tel dawn bakah Nagaland Baptist Church Council (NBCC) leh Nagaland Gaon Burhas’ Federation (NGBF) aiawhte pawh an tel ang. RN Ravi hian kar liam ta Ningani khan NSCN (IM) hruaitute leh an general secretary Thuingaleng Muivah-te chu meeting a lo neihpui tawh bawk.

Nagaland-a Naga pawl lian ber Naga Hoho chuan Pathianni khan thuchhuah siamin, Naga-te dikna chanvo humhimna tel lo inremna chu an pawm dawn lo tih sawiin, an thil phut zingah hian Naga flag hran leh constitution hrante pawh a tel tih an lo sawi tawh a ni. 

Heng an thil phutte hi tihhlawhtlin a nih loh chuan inremna zahhawm leh pawmawm tak a ni lo ang tiin an lo sawi tawh bawk. Hemi chungchangah hian Naga Hoho president HK Zhimomi leh general secretary K Elu Ndang-te chuan thuchhuah inṭawm siamin sorkar laipui aiawh palaiin PM Modi-a'n thla thum chhunga Naga buaina chinfel a duh tih a lo sawi tawh pawh chu an pawm lo tih sawiin, thla thum chhung leka chinfel chi a nih loh thu an lo sawi tawh a ni.