NRL privatise tum chungchangah Assam group-te an lungawi lo

Sorkar laipuiin Numligarh Refinery Limited (NRL)-a major shareholder, Bharat Petroleum Corporation Limited (BPCL) privatise a tum chungchangah Assam-a pawl hrang hrangte an lungawi lo hle. 

Forum Against Citizenship Act Amend­ment Bill (FACAAB) chuan sorkar laipui thiltih tum dan chu inphiarrukna ang hiala an ngaih thu sawiin, a ruahmanna siam chu sut nghal tura an phut thu a sawi. FACAAB chairman, Hiren Gobain chuan NRL chu  kum ruk zet an buaipui hnua an neih a nih thu leh, Assam mipuite nena inzawmna  nghet tak nei a nih thu a sawi. Sorkar laipui chuan NRL chu privatise a tum tih sawi kher lo mah se, he refinery-a shareholder lian ber, 61.65% share neitu BPCL chu privatise a tum avangin hei hian NRL pawh a nghawng nghal tih a sawi. 

Sorkar laipui hian BCPL-ah share 52% a nei a, BPCL hi privatise a nih chuan NRL pawh a ni ve nghal dawn tih Gohain chuan a sawi. NRL privatise tumna duh lohna lantir tur hian forum chuan kum 1985-a Assam Accord ziahnaa tel ve, All Assam Students' Union (AASU) bakah pawl dangte pawh hma la turin a nawr nghal bawk. 

FACAAB chuan NRL hian kum 2000-a hawn a nih aṭang khan sum hloh a la nei ngai lo a, kum thum kal ta chhung khan hlep cheng vaibelchhe 2,000 chuang zet a la lut pha a, state sum hmuhna kawngah pawh a thawh hlawk hle tih a sawi. NRL-ah hian thawktu nghet 1,000 chuang leh a nghet lo 2,000 vel an awm a, thawktu zinga 80%-85% chu tualchhung mi an ni a, privatise a nih chuan thawktute dinhmun pawh hi a derthawng nghal dawn a ni, tiin a sawi.