Tourism chawilar nan AP CM-in km 122-a thui bike-in kal
Arunachal Pradesh chief minister Pema Khandu chuan Yingkiong tlawhin, Mahatma Gandhi piancham vawi 150-na puala 'Gandhi Sankalp Yatra' buatsaihah a tel.
Kum 40 mi, chief minister Khandu hian tourism chawilarna kawng khat atan Upper Siang district headquarters aṭangin km 122-a hla Pasighat, East Siang district chu bike-in a kal a ni.
Chief Minister Office chuan thuchhuah a siamah, CM in bike-a hmanna chhan hi Arunachal Pradesh chu motorcycle hmang pawha tlan kualna hmun nuam tak a ni tih lantir a, tourism chawilarna tura a tih a ni, a ti. Khandu hi Yinkiong circuit house aṭangin zing dar 8-ah bike hian tlanchhuakin, chawhma dar 10.30-ah Pasighat airport a thleng a ni. Kawng pawh a ṭhain khaw hawi a nuamin a mawi hle tih CMO thuchhuah chuan a tarlang bawk. CM hian a twitter-ah motorcycle road trip video hi a post nghal a, Arunachal chu biking leh adventure sports neihna atana hmun duhthusam a ni tiin a sawi.