Citizenship Bill chungchangah Congress-in BJP a thlawp lo : Assam FM

Assam finance minister Himanta Biswa Sarma chuan Congress party-in National Register of Citizens (NRC) a telh lohte an khawngaih­zia an lantir laiin, Parliament-a Citi­zenship Amendment Bill, 2017 pass tum chungchangah Assam-a BJP kaih­hruai sorkar chu a thlawp duh lo thung tih a sawi. 

Sarma chuan Barak Valley-a van­tlang inkhawm neih­naa thu a sawiah hemi chung­chang hi a sawi a ni. Minister hian October 21-a by-election neih turah BJP candidate Bijoy Malakar a campaign pui a ni. BJP hruaitu chuan, "Congress hruaitute chuan Citizenship Amendment Bill an thlawp tih sawi rawh se. NRC a tel lo an khawngaih thu sawiin an aupui a, mahse Parliament-a CAB pharh a nihin he bill hi an thlawp leh si lo," tiin a sawi.  

August 31-a Assam sorkarin NRC final list a tihchhuahah khan mi nuai 19 chuang an tel lo a, an zinga tam tak hi Bengali Hindu-te nia sawi an ni.  

BJP kaihhruai sorkar laipui chuan sorkar hmasaah khan CAB hi Parliament-ah pass thei lo mah se, sorkar tharah hian siamṭhain pass ngei a tum. CAB siamṭhat hi Parliament thlasik ṭhutkhawmah pharh hman tum a ni. Sarma chuan, "Assam-a Congress-in kum 15 sorkarna an chelh chhung khan Muslim-te chu thah niin thlaphang takin dah an ni ṭhin. Kokrajhar, Udalguri leh Mangaldoi-ahte intualvuakna a chhuak bawk. Congress chuan Hindu-te ṭhendarh tumin an bei a, Bodo leh Muslim-te inkarah inthliarhranna an siamchhuak bawk a ni," a ti. Minister chuan BJP-in sorkarna a chelh hnuah, Assam-ah chuan Muslim mi pakhat pawh thah an ni lo tih a sawi. BJP chuan sakhaw behchhan ni loin, hmasawnna hna thawh hmangin vote a zawng zawk a ni, a ti.