Assam-in railway link hlui hawn thar leh duh

Assam sorkar chuan Bangladesh nena inkalpawhna atana hman ṭhin, rel kawng hluite hawn thar leh a duh a, hemi chungchang hi Ministry of External Affairs (MEA) leh NITI Aayog hnenah a thlen. 

Assam industry minister Chandra Mohan Patwary chuan, "Agartala-Akhaura Railway Link (Bangladesh) siam hna thawh mek a nih chungin, MEA leh NITI Aayog hnenah Assam leh Bangladesh inkalpawhna rel kawng hlui pathumte chu siamṭha a, hawng thar leh turin kan sawipui a ni," a ti. 

India leh Bangladesh insumdawn tawnna chungchanga sawiho turin October 22 leh 23 hian Guwahati-ah stakeholder meeting neih a ni dawn. He hunah hian Bangladesh palaite chu minister of commerce Tipu Munshi hoin an tel dawn a, Bangladesh official 70 vel an tel dawn a ni. India lam aiawhin ministry of commerce, extenal affairs, road transport and shipping official-te an tel  bawk ang. 

Kum 2018-19 chhunga India leh Bangladesh insumdawn tawnna hi US dollar tluklehdingawn 10.2 a tling pha. Hetihlai hian Land Custom Stations kaltlanga hmarchhak bial leh Bangladesh insumdawn tawnna hi USD maktaduai 74 chauh a tling pha thung. Guwahati-a meet an neih turah hian hmarchhak bial leh Bangladesh-te insumdawn tawnna zau leh lian zawk neih theih dan turte pawh sawiho a ni dawn a ni.