Tripura sorkarin police officer-te chungah action la
Tripura sorkar chuan cheng vaibelchhe 600 tihchingpennaa inhnamhnawiha puh, state minister hlui Badal Chowdhury man tuma zawnnaa inhnamhnawih, police officer eng emaw zat chungah action a la.
Communisty Party of India-Marixt (CPI-M) hruaitu, minister hlui Badal Chowdhury-a'n anticipatory bail a dilna chu court-in a hnawlsak a, hemi hnu hian man tuma zawn nghal a ni. Mahse nimin thleng khan Chowdhury hi man a la ni lo.
State sorkar chuan Chowdhury man tuma zawnnaa officer in-charge-te lakah action a la nghal. West Tripura Superintendent of Police Ajit Pratap Singh chu suspend a ni a, Deputy Inspector General (Southern Range) Arindam Nath leh Subdivisional Police Officer Dhruva Nath-te chu an post aṭangin sawn an ni bawk. Sum tichingpen nia sawi chungchang chhuitu officer Raju Reang pawh sawn niin, Deputy Superintendent of Police Ajoy Kumar Das chu case-in-charge atan dah a ni.
Ningani zing khan he thubuai kaihhnawihah hian police-te chuan CPI-M MP Narayan Kar leh Chowdhury guard pahnihte an man tawh bawk a ni. Chowdhury ukil chuan court sang zawkah bail dilna hi thehluh leh an tum tih a sawi. Tripura police-ten Chowdhury man tuma an zawnnaa Nilaini zana CPI-M office an luhchilh dan chu dan kalh a ni tih sawiin, zing khawvar hun an nghak tur a ni, a ti.