BJP kum nga dang hun min pe leh ula Tuilian thlen tawh lohna Assam kan siam ang : Amit Shah

Union home minister Amit Shah chuan January 24 khan Assam-a Nalbari-ah assembly inthlan neih tur puala rally buatsaihah thu sawiin, inthlanah hian BJP in sorkarna an chang leh a nih chuan Assam state chu tuilian thlen tawh lohna hmunah an siam ang tih a sawi. 

BJP sorkar hnuaiah Assam-ah chuan kawng hrang hrangin hmasawnna  nasa tak a thleng tawh a ni tih a sawi a, hospital, kawng thar, college-te siam niin, industry-te pawh din thar a nih thu Amit Shah chuan a sawi. Assam harsatna chu BJP chauhin a chingfel thei a ni, tiin silai mu leh helna awm lohnaah Assam chu an siam tawh niin a sawi. 

Congress party pawh bei nghalin, Congress chuan dan loa Assam-a lutte chu vote bank-ah a hman avangin a dang thei lo a ni, a ti. "An vote hmuhna ber an nih avangin dan kalha luh an phalsak zel ang. Narendra Modi kaihhruai BJP sorkarin chauhin Assam chu dan loa lutte lakah a venghim thei a ni," tiin Shah chuan a sawi. Hun rei tak Congress-in sorkarna a siam chhung khan Assam culture tan eng nge an thawh a, Assam tan eng ang hmasawnna nge an thlen tiin a zawt. 

Union minister hian hemi ni vek hian Kokrajhar-a Green Field-ah Bodo Peace Accord ziah kum khat tlin lawmna a hmanpui bawk a, PM Modi leh BJP chuan BTR Accord-a an ziahte chu tihhlawhtlin vek an tum tih sawiin, hei hian hmasawnna nasa tak a thlen dawn a ni, a ti. Kokrajhar a kalnaah hian Amit Shah hi Assam chief minister Sarbananda Sonowal leh health, finance and education minister Himanta Biswa Sarma-ten an ṭawimawm a ni.