CorCom-in Manipur-ah R-Day boycott

Manipur-a helpawl paruk intelkhawmna, Co-ordination Committee (CorCom) chuan vawiina an state-a Republic Day lawm tur chu an boycott a,  darkar 18 chhung complete shutdown an puang bawk. 

CorCom bakah Allia­nce for Socialist Unity, Kangleipak (ASUK) pawhin Republic Day hi an boycott bawk. CorCom hian nizan zanlai aṭanga vawiin tlai dar 6 thleng shutdown an puang a, ASUK hian tukin zing dar 6 aṭanga vawiin tlai dar thleng shutdown hi an puang ve bawk a ni. 

Helpawlte hian Republic Day an boycott-na chu a hlawhtlinna turin mipuite chu vawiin hian hna thawk lo leh pawn chhuak lo turin an  ngen. Hemi rual hian sakhaw thil pawimawh, essential service leh medical em­ergency-te erawh chu an huam tel lo tih an sawi. 

Republic Day boycott tum vang hian Manipur police-te chuan state chhungah venhimna khauh takin an kalpui nghal a, Imphal west district police-te chuan Sinjamei area-ah in tinah kalin a mi chengte enfiah hna an thawk.  An enfiahnaah hian hel pawl member, bail-a chhuak mek mi 10 pawh hmuh chhuah an ni a, mahse man erawh an nei lo. Imphal east district-ah police-te chuan mipui an enfiahna identification paper  mumal nei lo mi 11 an hreng a ni. 

State sorkar chuan Republic Day lawmna boycott tum awm mah se, ruahman lawk angin a lawmna hi neih a ni dawn tih a sawi a, hemi atan hian venhimna lam pawh uluk taka kalpui mek a ni, a ti.