Tripura sorkarin sanitary napkin a thlawnin sem dawn

Tripura sorkar chuan 'Kishori Suchita Abhiyan' scheme hnuaiah an state chhunga Class 6-12 zirlai hmeichhia nuai 1.68 chuang hnenah a thlawnin sanitary napkin a sem ṭhin dawn.

Education minister Ratan Lal Nath chuan he programme atan hian sorkar chuan kum khat chhungin cheng vaibelchhe 1.68 vel a seng dawn niin a sawi. A thlawna sanitary napkin sem tur hian sorkar leh private school-a kal zirlai hmeichhiate a huam vek dawn tih a sawi bawk.  He scheme hian zirlai hmeichhiate an period lai a nih avanga school an chawlh phah ṭhin venna turin hma a la dawn a ni. 

Hei bakah hian state sorkar chuan sorkar laipuiin 'School Bag Policy' a siam pawh zawm a tum bawk. Kaihhruaina siamah hian zirlai naupang, class 1-10 inkarte school bag rih zawng chu an taksa rih zawnga aṭanga 10% aia rit lo a ni tur tih a ni. 

Nikum March thla khan Assam sorkar chuan Class 6-12 zirlai hmeichhiate hnenah a thlawnin sanitary napkin a sem dawn tih hi a lo puang tawh bawk a, December thla khan Tamil Nadu sorkar chuan urban area-a sorkar school-a zirlai hmeichhiate  hnenah sanitary napkin sem an ni tur thu hi a lo puan tawh bawk.