Manipur-ah comic textbook tlangzarh

Manipur education minister Thokchom Radeshyam chuan Thawhṭanni khan a vawi khatna atan zirlai bu atana hman tur, comic textbook a tlangzarh. 

Minister-in a tlangzarh hi Class III zirlaite hman tur, Comic Textbook on Environ­mental Studies a ni. Minister chuan an state-ah comic textbook an hman ṭum khatna tur a ni tih a sawi a, an tum ber chu hemi hmanga naupangten an zirlai awlsam leh nuam ti taka an zir theih a ni, a ti. He textbook hmang hian naupangte rilru pawh hip a awlsam a beisei thu leh, an hriatna tihzauna kawnga pawh a puih ngei a beisei thu a sawi. 

Zonal education officer leh zirtirtute hnenah pawh school examination kalpui dan pawh ṭha zawka kalpui dan ngaihtuah zel turin a chah bawk. Education department director Thokchom Kirankumar pawhin thu sawiin, comic textbook chu an zirlai bu danga mite zulzuia siam a nih thu a sawi. 

Manipur sorkar hian zirna tihchangtlunna turin kawng hrang hrangin hma a la mek a, kumin January thla khan 'School Fagathansi Mission' pawh a lo kalpui ṭan tawh a ni.