Guwahati-ah India-Bangladesh Stakeholders' Meet nei
Ni hnih awh, India-Bangladesh Stakeholders' Meet chu Thawhlehni leh nimin khan Guwahati-ah neih a ni. He meet-ah hian India leh Bangladesh insumdawn tawnna leh thawhdunna zau zawk siam dan turte sawiho a ni.
Meet-ah hian Bangladesh commerce minister Tipu Munshi chu khuallian a ni a, ram pahniha senior diplomat leh official-te an tel. India lam aiawhin Assam chief minister Sarbananda Sonowal leh Tripura chief minister Biplab Kumar Deb te pawh an tel a, union minister VK Singh pawhin a hmanpui bawk. Ram pahnih aṭang hian palai 70 vel ve ve an tel.
Meet hawngtu, Assam CM Sonowal chuan India-Bangladesh Stakeholders' Meet chuan India leh Bangladesh thawhdunna tihchakna kawngah chanvo pawimawh tak a nei a ni, a ti. Ram pahnihten inlaichinna ṭha an neih duhtu leh hemi tipuitling tura a taka thawktu, political leader ṭha tak an nei chu an vannei hle tih a sawi bawk.
Tripura Chief Minister Deb pawhin ram pahnihin economy leh culture lama inzawmna ṭha an neih dante sawiin, insumdawn tawnna pawhin hma a sawn zel thu a sawi.