Naga peace talk: Imphal-ah zirlaiten lung-awi lohna lantir

Naga peace talk neih mekah, inremna an siam turin Manipur ram chin a khawih tel an duh lohna lantirin Thawhlehni khan Manipur khawpui, Imphal-ah zirlaiin lungawi lohna an lantir. 

Imphal-a college hrang hranga zirlaite hian pawl din thar, Coordinating Committee on Manipur Integrity (COCOMI) hmingin nawrh hi an huaihawt a, anmahni college campus-ah thuziakte keng langin lungawi lohna hi an lantir a ni. Mahse police-ten zirlai nawrh huaihawtte hi an tihtawp zui nghal a ni. 

Thawhṭanni-a United Committee Manipur (UCM) in Naga peace talk chungchanga 'emergency meeting' a kohah COCOMI hi an din a ni. He committee hi Naga helpawl leh sorkar laipuiin inremna an siam tura eng emaw kawng zawnga Manipur a khawih tel an duh lohna lantirna atana an duan a ni. 

COCOMI-ah hian All Manipur United Clubs’ Organisation (AMUCO), Committee of Civil Societies Kangleipak (CCSK), Ethno Heritage Council (HERICOUN), League of Indi­genous Peoples’ Upliftment (LIPUL) leh United Committee Manipur (UCM) te an tel a ni. 

COCOMI coordinator Sunil Karam chuan sorkar laipui leh Naga helpawl, NSCI-IM-ten inremna kawng zawnga inbiakna an neih mek, October 31-a a hmawrbawk an tumnaah chuan Manipur mite, a ram chin chu khawih tel a ni tur a ni lo, a ti. Inremna an siama Manipur khawih tel a nih chuan an ngai zam mai dawn lo tih a sawi bawk.