Conrad-an project puitlin nan Rs vbc 1,000 a dil
Meghalaya chief minister Conrad Sangma chuan an state-a infrastructural project eng emaw zat tihkhawtlai mekte zawhfel a nih theihna atan, sorkar laipui hnenah ṭanpuina cheng vaibelchhe 1,000 a dil.
Thawhṭanni khan Conrad hian prime minister Narendra Modi hmuin, state mamawh hrang hrangte a thlen. Project zawhfel a nih theihna atana sum mamawh a dil zingah hian, Meghalaya Legislative Assembly sak mek tihpuitlinna pawh a tel nghal tih a sawi. Meghalaya-in nakkuma National Games a thlen tur atana an inbuatsaih dante pawh PM hi a sawipui bawk.
PM pawhin Conrad thu thlente hi an lo enzui tur thu leh, National Games neih hmaa project hrang hrangte thawh zawh hman an nih theih dan tur lo ngaihtuah pui a tiam bawk. Conrad hian PM chu Water Conference leh Pigger Mission hawnnaa tel turin a sawm a, NIFT Shillong hawnnaah tel turin a sawm bawk.
Meghalaya Chief Minister chuan Bangladesh nena inzawmna ṭha zawk siam a nih theih nan leh, Bangladesh rama bungraw thawnchhuahte tihpun dan ngaihtuahin, November thla hian state sorkar aiawhten Bangladesh an tlawh tur thu hi PM a hrilh bawk a ni.
CM hian Thawhlehni khan union home minister Amit Shah, defence minister Rajnath Singh leh minority affairs minister Mukhtar Abbas Naqvi te pawh a hmu a, state mamawh hrang hrangte sawipuiin Citizenship (Amendment) Bill chungchang pawh a sawipui bawk a ni.