Assam Accord, CAA chungchangah Debate neihpui turin PM Modi sawm

All Assam Students' Union (AASU) advisor Dr Samujjal Kumar Bhattacharya chuan prime minister Narendra Modi chu Assam Accord leh Citi­zenship Amendment Act (CAA) chungchangah open debate neihpui turin a sawm. 

Assam Accord Claus 6 high level committee member ni bawk, Bhattacharya chuan dan loa an state-a lutte chuan Assam leh hmarchhak state dangah a leilung fate ṭawng, culture, leh nihna thlengin an tiderthawng thei a ni, a ti. 

"Hmarchhak bial pum tan, dan loa lut chu eng sakhaw mi pawh ni se, Hindu emaw Muslim emaw pawh ni se ram dang mi an ni reng tho. PM hian a term hmasaah Assam Accord hman chungchang sawihona hun a nei theih lo a, tunah hian a term hnihna a hmang leh  mek a ni," a ti bawk. 

Bhattacharya chuan Assam Accord Claus 6 high level committee chu sorkar laipui din a nih thu a sawiin, committee hian February 10 khan report pawh a peihfel vek tawh tih a sawi bawk. "Committee hian sorkar laipui hnenah lehkha pathum a thawn tawh a, tunah chuan kal zel dan tur chu sorkar laipui leh state sorkar kutah a awm tawh a ni," tiin Bhattacharya chuan a sawi. 

Report an thehluh chung­changah tun thlenga sorkar laipui lam aṭanga chhanna an la hmuh loh avangin high level committee member dangte pawh an lawm lo hle tih a sawi bawk.