Zirlaiten Manipur Private Schools Act hman phut

Manipur Private Schools (Registration and Regulation) Act, 2017 hman phutin Nilai­ni khan Imphal-ah zirlaiten kawng an zawh.

 

Kawngzawh hi All Manipur Students’ Union hminga huaihawt a ni a, Private Schools Act hman an phut bakah state chhunga hostel leh boarding-te tan dan khauh tak hman an phut bawk. Kawngzawhnaah hian Imphal khawpui chhunga school leh college hrang hranga zirlaite an tel bawk. 

AMSU secretary Bruce Pebam chuan Manipur Private Schools (Registration and Regulation) Act, 2017 hi siam ni mah se, a taka hman a la ni lo tih a sawi. Hei vang hian state chhunga private school, hostel  leh boarding-te chuan an duh dan angin an kalpui mai niin a sawi. 

State chhunga zirna ṭha a awm theihna atan leh, zirlaite dinhmun ṭha zawka an awm theihna turin he dan hi hman thuai a ngai a, a ṭul anga hma la turin state sorkar an ngen tih Pebam chuan a sawi. An ngenna hi sorkarin a ngaihtuah thuai loh chuan, AMSU chuan kawng hrang hranga nawr zel a tum tih a sawi bawk a ni.