By-election result a chhuak Sikkim CM thlan tlin a ni

Assam, Meghalaya, Sikkim leh Arunachal Pradesh-ah by-election result chu nimin khan puan a ni. Sikkim-a by-election neihah chief minister nilai PS Tamang chu hneh taka thlan tlin a ni. 

By-election hi Thawhṭanni khan neih a ni a, Assam-ah seat pali, Meghalaya-ah seat khat, Sikkim-ah seat pathum leh Arunachal Pradesh-a seat khatah neih a ni. Arunachal Pradesh-a Khonsa West Assembly-a by-election neihah, party panga-ten an thlawp, independent candidate Chakah Aboh chu a chak. Chakah Aboh hi Khonsa West bialtu MLA hlui, helhoin May thlaa an kahhlum tak NPP hruaitu Tirong Aboh nupui a ni. A nupui hian a pasal bial thihsanah hian independent-in a chuh a, party panga-in an thlawp a ni. 

Assam-a assembly bial paliah inthlan hi neih a ni bawk a, rorellai BJP chu bial pathumah chakin All India United Democratic Front (AIUDF) chuan seat khat a la ve bawk. Sikkim-ah chuan bial pathum, Gangtok, Martam-Rumtek leh Poklok-Kamrang-ah by-election hi neih a ni a, BJP-in bial hnih lain Sikkim Krantikara Morach (SKM)-in seat khat a la. SKM can­didate chief minister PS Ta­mang chu Poklong-Kamrang bialah hneh taka thlan tlin a ni. 

Meghalaya-ah Shella assem­bly bialah by-election neih a ni bawk a, United Democratic Party (UDP) candidate Balajied Kupar Synrem chu thlan tlin a ni. Synrem hi chief minister hlui Donpukar Roy fapa a ni a, a pa bial thihsanah a fapa hi thlan tlin a ni ve leh ta a ni.