Tripura police-te chief secy hlui man turin Delhi-ah kal dawn
Tripura police-te chuan PWD project sum tam tham tihchingpennaa inhnamhnawiha puh zinga mi, chief secretary hlui Y P Singh chu man turin a chenna, Delhi-ah an kal dawn tih an sawi. He thubuai kaihhnawihah hian PWD minister Badal Choudhury leh PWD chief engineer Sunil Bhowmik chu man an lo ni tawh bawk.
Senior police official chuan Crime Branch chuan kum 2008-09 chhung khan Tripura Public Works Department-a principal secretary in-charge, YP Singh hi Delhi-a a chenna aṭanga man a nih theihna turin thil ṭulte an buaipui mek tih a sawi. Crime Branch team hi Delhi-ah kal thuai an tum.
Crime Branch hian Badal Choudhury leh Sunil Bhowmik-te chu development project 13 sum tam tham tak tichingpena puhin an lo man tawh a, mahse an pahnih hian damdawi-inah enkawl mek an ni. Tripura-a BJP kaihhruai sorkar chuan he thubuaia inhnamhnawiha puh, minister hlui Choudhury an man mai theih loh avangin police pakua a lo suspend phah tawh a, an zingah hian IPS officer leh Deputy Superintendent of Police (DSP) pawh an tel. Senior police officer paruk a transfer bawk.
Tripura law and education minister Ratan Lal Nath chuan Left Front sorkar lai, kum 2008-09 khan PWD project 13 thawhna turin cheng vaibelchhe 638 zinga cheng vaibelchhe 228 zet chu tihchingpen a nih thu a sawi. He thilah hian hemi hunlaia PWD minister Choudhury leh official eng emaw zat an inhnamhnawiha puh an ni.