JMCH-ah kar khat chhungin nau piang hlim 20 an thi
Assam-a Jorhat Medical College and Hospital (JMCH)-ah kar kal ta chhung khan nau piang hlim 20 zet an thi a, hei vang hian thil awmdan enfiah turin state sorkar chuan doctor team a tir.
Assam health minister Himanta Biswa Sarma chuan Nilaini khan JMCH-ah doctor team tirh an nih thu hi a sawi a, hemi rual hian thla liam ta chhung khan he damdawi-inah hian damlo lut an pung hle tih a sawi bawk.
Minister chuan, "Damlo an pun thut nachhan hi kan hre chiang lo a, hei hi Jorhat leh a chhehvela inenkawlna ṭhat tawk loh vang pawh a ni thei a ni," a ti. Damlo an pun avangin thawktu lam an indaih tawk lo em tihte pawh zirchian a ni dawn tih a sawi.
Hetih lai hian Jorhat Medical College and Hospital hotute chuan damdawi-inah doctor leh nurse an indaih tawk tih an sawi thung a, nausen thihna thleng chungchangah pawh thawktu lam indaih loh leh fel loh vang a ni lo tih an sawi.
Himanta Biswa chuan tun hnaiah Assam-a sorkar damdawi-in hrang hrangah pawh damlo an pung hle tih a sawi a, hei hi sorkar laipui leh state sokarin healthcare leh insurance scheme a kalpui vang nia a lan thu a sawi.
Assam-a sorkar damdawi-in hrang hrangah pawh ICU khum dahbelh tura ngenna a tam a, sorkar pawhin Gauhati Medical College & Hospital (GMCH) leh JMCH-ah khum dahbelh a tum mek. Minister chuan Lakhimpur-a medical college sak hna pawh zawhfel a, hman theih tura peihfel thuai an tum tih a sawi. Thla ruk chhungin peihfel an tum niin a sawi. Hei bakah hian Changsari-ah All India Institute of Medical Sciences sak mek a ni tih a sawi bawk.