Naga peace talk: Manipur-ah all party meet buatsaih

Indo-Naga peace talk neih mek chungchang ngaihtuahin, Thawhlehni zan khan Imphal-ah Manipur all party meet neih a ni. Meeting hi chief minister N Biren Singh-a'n a kaihruai a ni. 

All party meet-ah hian sorkar laipui leh Naga helpawlten inremna siam tura inbiakna an neih chuan, Manipur ram chin a nghawng lohna atan leh, state inpumkhatna humhalh zel tura ṭanrual an duh thu sawiin resolution an pass. Party hruaitute chuan sorkar laipui hruaitute hmu tura all-party aiawhte tirh a, memorandum thehluh an rel a, deputy chief minister Y Joykumar kaihhruainaa drafting sub-committe din an rel bawk. 

Manipur chief minister hlui leh state assembly-a eptu hruiatu O Ibobi Singh chuan hun rei tak buaipui tawh, sorkar laipui leh Naga helpawlte inbiaknain hmawr a bawk thei dawn ta chu lawmawm a tih thu a sawi. Hemi rual hian Nagaland state ṭhenawmte, a bikin Manipur tana harsatna leh a mipuite rilru natna thlen lo zawnga inremna an siam ngei a beisei thu a sawi a ni. Manipur ram chin khawih tel a nih chuan theihtawpa an dodal tur thu Congress Legislature Party (CLP) meeting-ah a sawi. 

Civil society pawl hrang hrang intelkhawmin an din thar, Coor­dinating Committee on Manipur pawhin sorkar laipui leh NSCN-IM-ten inbiakna an neih mek chungchang, Manipur mipuiten chiang zawka an hriat theihna turin 'Cheksin Meepham' (alert meaning) tih chu Imphal West, Imphal East leh Bishnupur district-ahte an kalpui mek bawk.