Nagaland peace talk Pawhsei a ngai ang: NSCN-IM

Sorkar laipui leh Naga helpawl, National Socialist Council of Nagalim- Isak Mui­vah (NSCN-IM) ten inremna zawnga inbiakna an neih chu October 31 hian a hmawr an bawk tawh dawn nia sawi ni mah se, NSCN-IM army chief Anthony Shimray chuan an hun tiam hi pawhsei a ngai dawn niin a sawi. 

Guwahati-a chanchinthar lakhawmtute a kawmnaah, Simary chuan an hun tiam, October 31 chu pawhsei a ngai dawn tih a sawi a, hemi rual hian inremna tluantling a awm theihna tura hmalakna chu chhunzawm zel a ni ang, a ti. 

Sorkar laipui chuan in­biakna hmawrbawkna hun atan hian October 31 hi a ruat a, Ningani khan sorkar laipui leh NSCN-IM aiawhte hi Delhi-ah an inbe leh a ni. Meeting-ah hian Shimray chuan an pawl thil phut lian pahnih, Naga tana flag hran leh constitution hran siam chungchang pawh sawiho leh a nih thu a sawi. Mahse hei hi sorkar lamin a pawm nge a hnawlsak tih erawh sawilan a la ni lo. 

NSCN-IM hruaitu chuan inremna siam tur chuan party pahnihte chuan hun an la duh belh a, mipuite pawh biakrawn leh an ngai a ni, a ti. Naga talk neih meka sorkar laipuiin remna palai hna thawk tura a ruat, Nagaland governor RN Ravi pawhin sorkar hotute a biak kual hnuah Nagaland-ah a let leh ang a, NSCN-IM hruaitute pawh an let leh phawt dawn tih a sawi. 

Hetihlai hian sorkar laipui leh Naga helpawlten inremna an siam hian a ṭhenawm state, a bikin Manipur ram chin a khawih tel vengthawngin Manipur-ah chuan pawl hrang hrangin duh lohna an lantir. Manipur-ah hian Naga hnam chenna bial zau tak a awm avangin, Nagaland buaina chinfelnaah hian heng bialte hi a khawih tel hlauhthawnna a lian hle. Sorkar laipui pawhin Manipur, Assam leh Arunachal Pradesh-a Naga chenna bialte chu territorial council pek dan a ngaihtuahsak dawn nia sawi thawm a awm bawk a, hei hian Nagaland ṭhenawm state-te pawh a tihphawklek phah hle. 

Ningani khan Manipur-ah chuan Naga peace accord siam turin an state a nghawng tel an duh lohna lantirin Imphal-a kawngzawh huaihawt a ni.