Assam NRC coordinator thar tur la ruat lo

Supreme Court-in sorkar laipui leh Assam sorkar hnenah Natoial Register of Citizens (NRC) coordinator Prateek Hajela chu ni sarih chhung ngeia sawn tura a hriattir hnuah, a thlaktu tur hi ruat fel a la ni lo. 

October 18 khan Su­preme Court chuan Haj­ela hi Madhya Pradesh-a sawn turin a hriattir a ni. Hemi hnu hian Assam sorkar chuan thlaktu tur chungchangah sorkar laipui a rawn mek tih senior minister Himanta Biswa Sarma chuan a sawi. 

Himanta Biswa Sar­ma chuan SC hian ni sarih chhunga Hajela sawn­chhuak tura a hriattir rual hian, amah thlaktu tur hi state sorkarin a ruat thei dawn em tih a sawichiang lo tih a tarlang. A hmain SC hian NRC coordinator ruat chungchangah state sorkar chu a inrawlh theih loh thu a lo sawi tawh a, hei vang hian hma lak dan tur an la hre mai thei lo tih a sawi a ni. Sorkar laipui chuan nimin thleng khan Hajela transfer-na tur order hi a la tichhuak lo.

Sarma chuan Par­lia­ment thlasik ṭhutkhawma pharh tura sawi, Citi­zen­ship Amendment Bill chung­changah West Bengal chief minister Mamata Banerjee chu na takin a bei zui bawk. Banerjee hian CAB leh detention centre a duh loh thu a sawi fo tawh a ni. Sarma chuan CAB a awm loh chuan detention camp a awm ngei a ngai dawn a ni,  a ti. 

Assam-a detention camp-te pawh CAB pass a nih hnu chuan Hindu, Buddhist, Jain leh Kristian-te tan chuan khar a ni tawh dawn a ni, a ti. Assam-ah hian ramdang mi, dan loa lut an mante dahna de­tention centre paruk a awm a, centre lian zawk sak hna thawh mek a ni bawk.