Naga peace talk : Nagaland leh Manipur sorkarin inralring turin hriattir

Naga helpawl, NSCN-IM leh sorkar lai­puiin inremna kawng zawnga inbiakna an neih mek chu October 31 hian a hmawrbawk tum a ni a, inremna siam dan kawnga lungawi lo a, buaina a chhuah palh venthawn thilah Nagaland leh Manipur sorkar chuan an police-te chu inralring turin a hriattir. 

Nagaland sorkar chuan district tina depu­ty commissioner leh administrative officer-te chu an post-ah awm vek tur leh, thupek dang tihchhuah a nih hma chuan kalchhuak lo turin a hriattir. Nagaland Police head­quarters pawhin thupek tichhuakin, leave lak phal a nih loh thu leh, medical leave ni lo, thil dang vanga chawlh la mek police-te pawh ko kir nghal vek turin a hriattir bawk a ni. 

Manipur sorkar pawhin secu­rity force-te chu inralring turin a hriattir a, Naga tamna bial hrang hrangah security force ṭhahnem tak dahin, buaina siam zawnga chet tumna awmte lo dang zel turin a ti. Naga helpawl leh sorkar laipuiin inremna an siam tur hian Manipur-a Naga chenna bial a khawih tel duh loin Manipur-ah hian lungawi lohna an lo lantir fo tawh a ni. Manipur-a political party  hrang hrang aiawhte chuan hemi chungchangah hian prime minister Narendra Modi leh home minister Amit Shah pawh hmuh an tum a, Manipur mipuite duhdante thlen an tum. 

Sorkar laipui leh NSCN-IM aiawhte hian October 24 khan inbiakna an lo nei tawh bawk a, mahse hemi ṭuma an thurel leh sawihote erawh chu puanzar a ni lo. NSCN-IM hian kum 2015 khan sorkar laipui chu Framework Agreement an lo ziahpui tawh a, mahse an thil phut pahnih - Nagaland tana flag leh constitution hran siamsak chungchangah an la inrem thei lo a, October 31-a inbiakna an neih leh turah pawh an thil phutah hian an la ding nghet zel dawn tih an sawi.