CPI-M-in Assam-a detention camp khar phut

Communist Party of India-Marxist (CPI-M) Assam unit chuan Assam-a detention camp awmte chu khar vek turin an phut. 

Foreigners' Tribunal-in dan loa state chhunga pem lut nia a puante chu detention camp-ah hian dah an ni ṭhin. CPI-M state unit chuan inenkawlna mumal awm lohna, detention centre-a mi dahluh ṭhin hi thil nihphung a ni lo tih sawiin, heng camp-a awmte chu an taksa mamawh ang ei tur ṭha an hmuh loh vang te, an awm zel dan tur mumal taka ngaihtuah sak an nih loh avangtein an taksa leh rilru lam thlengin a nghawng a ni, a ti. 

Detention camp-ah hian mi tam tak an thi tawh tih sawiin, CPI-M chuan heng hmunah hian India khua leh tui dik tak ngei pawh dah an awm fo tih a sawi. Hei vang hian state sorkar chu detention camp-te hi khar a, dan loa lut ṭhinte chinfel dan chu kawng danga ngaihtuah zawk turin an phut. 

Hetihlai hian Assam-a National Register of Citizens (NRC) final list tihchhuahah mi nuai 19 chuang zet an tel lo a, hei vang hian khua leh tui dik tak ni lo, dan loa lutte awmna tur hi state sorkar chuan siam belh a tum mek a, an chungthu ngaihtuahtu tur Foreigners' Tribunal pawh 100 chuang siam belh a tum bawk a ni. 

Assam-ah hian detention camp paruk a awm mek a, Goalpara district-a Matia-ah detention camp hi siam mek a ni bawk. Peihfel a nih chuan mi 3,000 vel an awm thei ang. Thuneitute chuan nakkum kumtir lama hman theih tura peih hman an tum.