'No School Bag Day' policy chungchangah zirlaite kawm

Manipur sorkarin Inrin­ni-a 'No School Bag Day' policy a hman chungchangah, Mani­pur education minister Thokchom Radheshyam chuan kar kal ta Inrinni khan Thoubal district-a high school zirlaite kawmin, an ngaihdante a zawt. 

Minister hian Wangkhem Junior High School-a zirlaite chu hun hmanpuiin, 'No School Bag Day' policy an siam chu zirlaiten hlim leh nuamti taka lehkha an zir theihna tur kawng khat atana an duan a nih thute a sawi. He policy chungchanga an ngaihdante a zawhkualnaah, zirlaite chuan school bag tel loa school kal chu a nuamin a hahdamthlak an tih thute an lo hrilh bawk. Zirlaite chuan text book ami ringawt zir lo a, co-curricular activity an neih ṭhin chuan mi hmaa dinchhuah hlauhna an neih ṭhinte ti rehin, debate, extempore, lam leh sports lam pawh an zirbelh phah thu a sawi a ni. 

'No School Bag Day' policy hi Manipur Education Department (Schools) hian state chhunga school zawnga zawnga Class I - VIII zirlaite tan a siam a ni.