AIUDF hotuin Assam two-child policy sawisel

Assam sorkarin fa pahnih chin neihna policy kalpuia tum chu All India Demo­cratic Front (AIUDF) hotu Badruddin Ajmal chuan sawiselin, Islam sakhua chuan fa pahnih chauh neih chu a ring ve lo a, an duh zat zat an nei thei a ni, a ti. 

Assam sorkar chuan nakkum aṭang chuan fa pahnih aia tam neite chuan state sorkar hnuaiah hna an dil thei tawh dawn lo tih a lo sawi tawh a ni. AIUDF hotu chuan Assam sorkar chuan Muslim-te chu hna a pe ngai chuang lo tih sawiin, sorkar hna pawh an beisei tawh lo tih a sawi. Muslim-te chuan fa an duh ang zat zat an nei thei a ni tiin,"He  khawvela lo piang turte hi tumahin an dang thei lo," a ti. An duh ang zat fa neiin, ṭha takin lehkha an zirtir tur a ni, a ti. Sumdawnna, company leh dawrte siamin, an unau Hindu-te tan hna an siamsak ang a, hlim takin an awm tlang dawn a ni, tiin Ajmal chuan a sawi. 

Assam-a BJP kaihhruai sorkarin fa pahnih aia tam neite sorkar hna pek a tum tawh lo tih a sawi laiin Rash­triya Swayamsevak Sangh (RSS) chief Mohan Bhagwat chuan fa tam tak nei turin mipuite a fuih thung si niin a sawi. Hei vang hian eng nge an duh tak tih chu an tihchian a ngai a ni, a ti. 

"An duhdan ang hi ni se chuan tuna chief minister leh prime minister-te ho hi an piang lo ang. PM Narendra Modi chu an unaua a pangana a ni a, Assam CM Sarbananda Sonowal pawh unau zinga a pariatna a ni bawk," tiin a sawi. 

Assam Pradesh Congress Committee (APCC) president Ripun Bora pawhin Pathianni khan chief minister Sarbanada Sonowal two-child policy a sawisel.

Sarbanada Sonowal-a'n fa pahnih aia tam neite chuan sorkar hna an hmu thei tawh dawn lo nia a sawi chu Bora chuan na taka sawiselin democracy ramah chuan tumahin hetiang dan hi an kalpui tur a ni lo, a ti. Miin two-child policy an pawm theihna turin nasa zawka awareness neih zawk a ṭul thu sawiin, sorkarin kalpui a tum dan chuan rah ṭha a chhuah dawn lo tih a sawi.