Kaziranga Jeep Safari operator-te tan training buatsaih

India Tourism chuan Assam-a Kazi­ranga National Park (KNP) thuneitute leh biodiversity conser­vation organisation, Aaranyak nena thawkhoin, Kaziranga Jeep Safari operator-te tan ni hnih awh training an buatsaih. 

Training hi natio­nal park-a Kohora Range-a Centenary Confe­rence Hall ah kar liamta kartawpah khan buatsaih a ni. Jeep driver leh tourist guide 120 vel an tel a ni. He training-naa kalte hnenah hian khual­zinte an dawrna kawnga thil pawimawh hrang hrangte hrilh hriat an ni. 

KNP research officer, Rabindra Sharma chuan jeep driver leh tourist guide-te hnenah an tih tur leh tih loh tur hrang hrangte a hrilhfiah a, kum 25 chhung National Park a enkawl chhunga a tawnhriat hrang hrangte behchhanin zirtirna a pek bawk. 

Bhattadev University professor Arindom Talukdar pawhin jeep driver leh tourist guide-te chu man­ner, inchei dan, leh rinawmna chung­changte a zirtir bawk a ni.