UK-ah Manipur sorkar hran din
India lak aṭanga Manipur inlakhran duhtu pahnih, Yamben Biren leh Narengbam Samarjit te chuan Thawhlehni khan London-ah King Leishemba Sanajoabo hmingin Manipur sorkar, 'government in exile' an din.
Thawhlehnia London-a press conference an neihah, Yamben Biren chuan Manipur State Council chief minister a nih thu sawiin, Narengbam Samarjit chuan Council-ah hian minister of external affairs and defence a ni tih a sawi bawk.
Biren leh Samarjit-te hian kumin August thla khan UK-ah hian humhimna, political asylum pek an nih thu an sawi a, hemi hnuah Manipur sorkar chu London-ah hian an sawn ta tih an sawi a ni. Kum 1946, December 27 khan Manipur lal thupek angin, Manipur chu India aṭangin paih a ni a, mahse India sorkar chuan kum 1949 khan Manipur chu a awp zui leh a ni, an ti.
"Khawvel hriatah Manipur independent sorkar a din thu puanchhuah hun a ni tain kan hria a ni," tiin, United Nations member ramte hnenah Manipur sorkar an din chu pawm turin an ngen zui nghal bawk. Kum 2012, March thlaa India laka independence an puanna thuziakte an chhiarchhuak nghal bawk a ni.
Biren leh Samarjit-te nen inzawmna siam tuma an beihnate chuan ngaihven a hlawh loh bakah, huatna nen an lo chhang let zawk tih an sawi. Manipur-a sorkar hriatpuina avanga civil mite tihhlumna thleng thubuai 1,528 chuang zet chu Supreme Court-ah tihkhawtlaiin a awm mek bawk a ni, an ti.
Samarjit chuan India hnuaiah Manipur chu a zalen lo a, an history-te tichhiatsakin a awm mek a, an culture pawh a bo mai dawn tih a sawi. Hei vang hian UN chuan an ngenna chu a ngaihthlak sak a ngai tih a sawi.