Naga peace talk: Muslim-ten memo-randum thehlut

Manipur-a Muslim based civil society organisation chuan Naga peace talk neih mekin Manipur a nghawng tel duh lohna lantir a, vawiina state puma nawrh huaihawt tum chu an thlawp tih sawiin, Manipur chief minister hnenah memorandum an thehlut. 

Coordination Committee on Manipur Integrity (COCOMI) chuan sorkar laipui leh Naga helpawl, NSCN-IM ten inremna zawnga inbiakna an neih mek chuan Manipur ram chin a nghawng tel an duh lohna lantir nan, vawiin hian state mipuite chu zing dar 4 aṭanga zanlai thlengin lungawi lohna lantir turin an ngen a ni. 

COCOMI hmalakna an thlawpna thu hi chief minister hnena an thehluhnaah, Popular Front of India (PFI) vice president Mufti Arshad chuan Manipur mipuite chuan state inpumkhatna leh dikna humhim tura a beihna kawngah state sorkar chu an  ringtawk a ni tih a sawi. Sorkar laipui chuan Naga buaina chinfelna tura Manipur mipuite duhdan kalh zawnga thutlukna a siam a nih chuan, Manipur ram chin humhalh turin an nunna thlenga hlan an inhuam thu a sawi.