Assam-in two-child policy kalpui ngei a tum

Assam sorkarin kum thar aṭanga fa pahnih aia tam neite sorkar hna a hmuh theih tawh dawn lo nia sawi chuan sawisel tawk mah se, Assam chief minister Sarbananda Sonowal chuan two-child policy chu kalpui  ngei  a ni dawn tih a sawi. 

Assam cabinet chuan mi­hring pung chak venna kawng khata fa pahnih chin neihna tur, two-child policy kalpui hi a lo rel tawh a ni. He policy hnuaiah hian fa pahnih leh a ai tlem neite tan chauh sorkar hna pek tawh turin an rel. 

Two-child policy hi eptu pawl, All India United Demo­cratic Front bakah Lok Sabha MP Badaruddin Ajmal chuan sawiselin, Islam sakhua chuan fa neih zat tur bithliah a, pahnih chin chuah nei tur tih hi a pawm lo a ni, a ti. Congress pawhin he policy hi sawiselin, democracy ramah tumah intihluih theih a ni lo, an ti. 

Mahse CM Sonowal chuan two-child policy hi hman a ni dawn a, engmah sawibuai theih a ni lo tiin a sawi. State finance minister Himanta Biswa pawhin he policy hi a ṭha tih sawiin, sawiseltu MP Ajmal chu Muslim-te fuihpawrh tumah a puh bawk.