AP-in Naga peace talk chungchang buaipui ve leh

Sorkar laipui leh Naga helpawl, NSCN-IM te inbiakna neih mek chu Manipur-in an buaipui viau hnuah Arunachal Pradesh pawhin aw an rawn nei ve leh a, Naga buaina chinfel nan hian an state chu khawih tel an remti dawn lo tih a sawi. 

All Arunchal Pradesh Students' Union (AAPSU) president Hawa Bagang chuan, sorkar laipui leh NSCN-IM inremna siam tur hian AP ram leh a mipuite chu eng kawng mahin a khawih tel tur a ni lo, tiin a sawi. AAPSU chuan chief minister Pema Khandu kaihhruai BJP sorkar chuan hemi chungchangah hian a dinna chiang takin a tilang tur a ni tiin, an state MP pathum, MLA 60 leh political party hrang hrangte pawh an state humhim tura lungrual taka thawkho turin an ngen. 

Nagaland state zau zawng hi  square km 16,527 a nih laiin, NSCN-IM in Naga mite chenna bial atana siam tura an phut, Nagalim map an siam hi square km 1,03,473 chuang zet a ni. Nagaland ṭhenawm state-a Naga chenna bialte rin luh tel niin, Arunachal Pradesh khawchhak lam pawh an rin tel a ni.