Tripura-a nawrh huaihawt zinga 300 chuang man

Tripura-a zirtirtu aṭanga bang, an hna ngaia dah kir  leh phuta nawrh huaihawt mek zinga mi 10,323 zinga 300 chuang chu nimin khan police-ten an man. 

Zirtirtu bante hian Joint Movement Commi­ttee hmingin ni 52 chhung nawrh an huaihawt tawh a ni. JMC leader Kamal Deb chuan nimin khan police-te hian zirtirtute inkhuarna hmun hi luh­chilhin, an puan inte tihchhiat sakin an zinga eng emaw zat chu an man tih a sawi. 

Hetih lai hian additio­nal superintendent of police Shasvat Kumar chuan nawrh huaihawtnaa  buaina chhuak a awm avangin an zinga ṭhenkhat chu man an ni tih a sawi thung. Zirtirtu bante hian nikum December 7 aṭang khan an hnaah dah let phutin nawrh an huaihawt a, an thil phut tihlawhtling tur hian sorkar chuan January 25 thleng kha hun an pe a ni. Mahse an hun tiam chhunga an thil phutte tihhlawhtlin a nih loh avangin, Thawhlehni zan khan Agartala-ah torch rally an buatsaih a, nimin khan chief minister Biplab Kumar Deb hmuh tumin a chenna in pana kawng zawh an tum tih an sawi. 

Mahse kawng zawh hma, nimin zing khan police leh paramilitary force ṭhahnem tham tak chu Agartala khawpuiah dah belh niin, security force-te hi zirtirtu ban ten nawrh an huaihawtna hmun hi kalin, an puanin siamte an tihchhiat sak a, an hruaitute leh midang eng emaw zat an man a ni.  Nawrh huaihawtte pawh hian security force-te hi lo dan tumin an innawr buai a, motor-te pawh an tihchhiat sak nia sawi a ni. 

Buaina chhuak vang hian West Tripura district magistrate chuan nimin  zing aṭang khan Agartala-ah CrPC section 144 a puang nghal bawk. 

Zirtirtu ban takte hi sorkar hmasa, CPI-M sorkar laia lakte an ni a, mahse kum 2017 kha Tripura High Court chuan hna lak a nih danah thil dik tawk lo a awm nia sawiin ban turin a ti a, hei hi Supreme Court-ah thlen leh niin court hian a ngaihtuah hnuah High Court thutlukna hi a pawmpui a ni. Nikum March thla khan heng zirtirtute hi an hna aṭang hian ban a ni ta a ni.