Assam sorkarin ṭhalai 80,000 tan hna siamsak tawh

Assam governor Jagdish Mukhi chuan Thawhlehnia Republic Day lawmnaa thu a sawiah,  Assam-a BJP kaihhruai sorkar chuan kum li leh a chanve liam ta chhung khan ṭhalai hna nei lo, mi 80,000 tan hna a siamsak tawh a ni, a ti. 

Ṭhalai hna siamsakte hi permanent leh contract-te an ni tih a sawi bawk. 

BJP sorkar hnuah Sarva Shiksha Abhiyan (SSA) hnuaiah zirtirtu Teacher Eligibility Test (TET) pass, state pool teacher, secondary school-a contractual teacher leh National Health Mission hnuaia thawk, mi 46,150-te pension kum chu kum 60-ah pawhsei a ni bawk niin Governor chuan a sawi. 

Chief minister Sarbananda Sonowal kaihhruai sorkar chuan an lo tiam tawh angin Assam chu eirukna laka fihlim state-a siam tumin theihtawpin hma a la zel a ni, a ti. Eirukna umbo tura hmalaknaah sorkar chuan eiruk kaihhnawih thilah officer 229 a man tawh a, welfare scheme dik lo taka kalpui a nih dante hailangin, MGNREGA hnuaia dik lo taka hamṭhatna dawngtu nuai 14 vel a paih tawh bawk a ni, a ti. 

Covid-19 hripui leng a dona kawngah, state sorkar chuan lockdown puan avanga hmun hrang hranga Assam mi tangkang, mi nuai 3.89 hnenah chhawmdawlna Rs 4,000 ṭheuh a pe bawk tih a sawi. Kum 2016 aṭang khan state sorkar chuan state leilung fa, ram nei lo chhungkaw nuai 2.28 chuang hnenah land patta a pe tawh a, tribal-te thuam chakna turin sorkar chuan autonomous council tharte pawh a din bawk a ni, tiin Govenror chuan a tarlang.