Assam-in NRC final list tichhuak

Assam sorkar chuan kar kal ta Inrinni khan National Register of Citizens (NRC) final list a tichhuak. Final list-ah hian India khua leh tui dik takah mi  3,11,21,004 dah an nih laiin, state chhung mi leh sa zinga mi 19,06,657-te erawh chu list-ah hian telh an ni lo thung. 

NRC list-a tel lote hian court-ah an buaipui a ngai dawn a, hemi buaipui tur hian state sorkar chuan Foreigners' Tribunal 400 a din dawn a ni. Assam rama dan loa awmte dapchhuah hna hi kum ruk chhung zet kalpui a nih hnuah, Inrinni chawhma dar 10 khan final list hi online-in tihchhuah a ni. Hemi hma, nikum khan draft NRC hi tihchhuah a lo ni tawh bawk a, hemi ṭum hian list-ah hian mi vaibelchhe 2.8 an tel lo a ni. List-a tel lo mi nuai 36 chuangten dilna an thehlut leh a, hengte hi enfiah ṭhat leh an nih hnuah final list hi tihchhuah a ni ta a ni. 

Assam sorkar chuan NRC final list-a tel lote chu man nghal an ni dawn lo a, Foreigners' Tribunals (FT) leh court sang zawkah pawh an appeal theih tur thu a sawi. 

NRC final list tihchhuahah hian All India United Democratic Front (AIUDF) MLA nilai Anatan Kumar Malo leh IUDF MLA hlui Ataur Rahman Mazharbhuyan pawh an tel lo. Malo chuan a unaupa nen data inang reng an thehluh laiin, list-ah hian a unaupa telh ni mah se amah chu a tel lo tih a sawi. Amah ang bawkin dik lo takin mi tam tak list-ah telh loh an ni ve dawn tih sawiin, hei hian he system dik tawk loh zia a tilang a ni, a ti. Mazharbhuyan pawhin list-ah hian amah bakah a fanute pahnih leh a fapa pawh an tel lo tih a  sawi. 

Assam BJP pawhin list-ah hian khua leh tui dik tak tam tak telh loh an nih laiin, dan loa Assam-a pemlutte an tel thung tih an sawi. Assam BJP chief Ranjit Kumar Dass chuan, " CM hlui Hiteswarw Saikia chuan Assam-ah dan loa

Bangladesh aṭanga pem lut mi maktaduai thum vel an awm tih a sawi a, union minister S.P.Jaisawal pawhin dan loa pem lut mi maktaduai nga vel an awm tih a sawi. Hetichung hian final list-ah hian dan loa pem lut anga sawi chu mi nuai 19 vel chauh nia tarlan a ni leh si a ni," tiin a sawi. 

All Assam Students' Union (AASU) chuan NRC final list-ah mi nuai 19 chuang tel loh an nih chungchangah Supreme Court-ah zualko an tum tih an sawi. AASU chief advisor Samujjal Bhattacharya chuan NRC kalpui danah thil fel tawk lo a awm nia an hriat thu sawiin, Supreme Court-ah a siamṭhat dan ngaihtuah tura an thlen tur thu a sawi. 

Civil society organisation, Assam Public Works pawhin NRC list tihchhuahah an lungawi loh thu sawiin, President inrawlh tura an ngen tur thu an sawi bawk. 

National Register of Citizens (NRC) final list nuai 19 chuang telh loh an nih chungchangah, hmarchhak biala Congress hruaitute chuan nimin khan party interim president Sonia Gandhi hmuin, NRC chungchang an sawipui nghal. 

Sonia Gandhi  hmutute zingah hian Meghalaya chief minister hlui Mukul Sangma leh party MP Gaurav Gogoi pawh an tel. Darkar thum zet meeting an nei a, meeting zawh hnua chanchinthar lakhawmtute a kawmnaah, Gaurav Gogoi chuan Sonia Gandhi leh party hruaitu dangte chuan NRC chungchang hi an la sawiho dawn tih a sawi. 

Gogoi chuan, "NRC final list tihchhuahah Assam mipuite an lungawi lo hle. BJP minister-te ngei pawhin an complaint a ni. Fimkhur lo taka he thil kalpui hian India khua leh tui dik takte ngei pawhin court an hmachhawn a ngaih phah dawn a ni. Congress chuan a theih angin heng mite hi a pui zel dawn a, politics aiin ram a dah chungnung zawk a ni," a ti.