Union minister Rijiju-a'n Chandel HQ a tlawh

Union Youth Affairs and Sports State Minister (Independent Charge) leh Union Minority Affairs minister, Kiren Rijiju chuan Thawhṭanni khan Manipur-a Chandel district headquarters a tlawh a, 'Aspiration Districts Programme' review meeting a neihpui nghal. 

Chandel hi ramchhunga 'Aspiration Districts Programme' kalpuina tura district 117 thlanchhuah zingah a tel a ni. Kiren Rijiju hi Manipur chief minister N Biren Singh-an a ṭawiawm a, programme hnuaia hnathawh hrang hrangte an en nghal a ni. Manipur chief secretary Dr J Suresh Babu  Administrative Secretary DC Krishna Kumar leh official dangte programme kalpui a nih dante an lo hrilhfiah a ni. 

Review meeting zawh hnua chanchinthar lakhawmtute a kawmnaah, Rijiju chuan sorkar chuan Chandel district chawikanna turin theihtawp a chhuah zel dawn tih a sawi. Chandel district chu hmasawnna lama a hnufum bik avangin  'Aspirational District' atan thlan a ni a, mahse thla 8-9 kalta chhung khan district chuan sector hrang hrangah hmasawnna nasa tak a nei tawh a ni, a ti. 

Union minister chuan Manipur-a National Sports University sak tur chungchang pawh a enpui dawn ti a sawi. Sports University sak tur hi ram chungchang leh work agency lamah harsatna a la awm avangin tihkhawtlai a ni. Minister chuan National Sports University chu state leh regional university a ni lo a, national level institute a nih avangin sorkar pawhin top class university a siam turin khawvela university ṭhate MoU a ziahpui tih a sawi.