Assam TE doctor sawisatu mi 22 man

Assam Jorhat district-a tea estate doctor sawisak rawn a nih chungchangah mi 22 man an ni. 

Kar kal ta Inrinni khan Teok Tea Estate-a senior medical officer, Deben Dutta (73) chu damdawi-ina tea estate-a hnathawk, damlo pakhat thih chungchangah mawhphurtua puhin sawisak rawn a ni. Doctor hian hliam na tak tuarin Jorhat Medical College Hospital-ah dah a ni a, a hliam tuar loin Inrinni zan khan a thi a ni. 

Official-te chuan doctor sawisak rawn chungchangah mi 22 te chu manin, Jorhat-ah chief judicial magistrate court-ah hruai an ni a, judicial custody hnuaiah dah chhunzawm an ni tih an sawi. He pawikhawihnaa inhnamhnawih, midang man belh tur an la awm tih an sawi bawk. Additional deputy commissioner, Subhan Gowalla kaihhruaiin pawikhawihna thleng chungchang hi magisterial inquiry neih mek a ni a, kar khat chhungin report an thehlut ang.

Indian Medical Assocation, Assam State Branch chuan he thil thleng duh lohna lantirin nimin zing dar 6 aṭang khan, Assam state pumah darkar 24 awh tur lungawi lohna an lantir. Hemi chhung hian emergency tih loh chu medical service kalpui a ni lo.