Tripura bye-election a Congress candidate tur puang

Congress party chuan Tripura Assembly bye-election neih tura an party candidate atan Ratan Das ruat a nih thu party interim president Sonia Gandhi chuan a puang. 

Party-in thuchhuah a siamah, General Secretary (Chief Election Committee) Mukul Wasnik chuan, "Sonia Gandhi-in Badhraghat-SC constituency bye-election neih tura Congress candidate atana Ratan Das ruatna chu a pawm a ni," a ti. 

Badhraghat bial MLA Dilip Sarkar chu kumin April thla tir khan a thi a, hei vang hian he bialah hian inthlan ṭhat buatsaih a ngai dawn a ni. Bye-election hi September 23 hian neih a ni ang.